(24 نیوز )نیشنل ڈیٹا بیس اینڈ رجسٹریشن اتھارٹی (نادرا) نے سعودی عرب میں مقیم پاکستانیوں کے لیے اہم پیغام میں کہا ہے کہ سعودی حکومت کی ہدایات پر حج سیزن کے دوران خدمات کی معطلی کے بعد نادرا آفس مدینہ منورہ میں 12 جولائی 2026 بروز اتوار سے خدمات کی فراہمی کا سلسلہ بحال کیا جارہا ہے۔
مدینہ منورہ اور نواحی علاقوں میں مقیم پاکستانی شہری 12 جولائی سے نادرا کی خدمات سے مستفید ہوسکیں گے، اس سے قبل نادرا کا کہنا تھا کہ سعودی عرب کے شہر جدہ میں موجود پاکستانی قونصلیٹ جنرل کی ہدایات کی روشنی میں حج سیزن 2026 کے دوران نادرا آفس مدینہ منورہ میں 12 اپریل 2026 سے خدمات کی فراہمی معطل کر دی گئی ہے جو سیزن مکمل ہونے پر دوبارہ بحال کر دی جائیں گی۔
مزید بتایا گیا تھا کہ متبادل انتظام کے طور پر نادرا رجسٹریشن سینٹر جدہ میں عملے کی تعداد بڑھا دی گئی ہے تاکہ زیادہ سے زیادہ پاکستانی شہری خدمات سے استفادہ کر سکیں۔
نادرا حکام کا کہنا تھا کہ پاکستانی شہری مزید معلومات کیلیے پاکستانی قونصلیٹ جنرل سے رابطہ کر سکتے ہیں، اس دوران اتھارٹی کی خدمات پاک آئی ڈی موبائل ایپ کے ذریعے دستیاب ہوں گی۔
یہ بھی پڑھیں :امریکی قونصلیٹ جنرل کے وفد کا ای پی اے لاہور کا دورہ،مریم اورنگزیب نے بریفنگ دی
