(ویب ڈیسک)نئی دہلی میں موجود ملائیشیا کے وزیراعظم انور ابراہیم نے مایہ ناز بھارتی گلوکار کشور کمار کا مقبول گیت ’’خواب ہو تم یا کوئی حقیقت‘‘ گا کر سب کو حیران کردیاہے۔
انور ابراہیم کی اچانک گیت گانے کی ویڈیو سوشل میڈیا پر تیزی سے وائرل ہوگئی، جس پر بڑی تعداد میں بھارتی صارفین نے مثبت ردعمل کا اظہار کیا۔
صارفین نے جہاں گیت کے انتخاب کو سراہا، وہیں وزیراعظم انور ابراہیم کی مصروف سفارتی سرگرمیوں کے دوران موسیقی کے لیے وقت نکالنے کو بھی پسند کیا۔
Malaysia PM Anwar Ibrahim sings a Hindi songs in Delhi. He is in Delhi for BRICS + summit. https://t.co/aXqEYPUYT4
— Sidhant Sibal (@sidhant) September 12, 2026
سوشل میڈیا پلیٹ فارم ایکس پر بشواجیت رائے نے تبصرہ کرتے ہوئے کہا کہ وزیراعظم نے لیجنڈری بھارتی گلوکار کشور کمار کا لازوال گیت گایا اور ان کی آواز نے بھی لوگوں کو متاثر کیا۔
ایک اور صارف پیوش مورادے نے انور ابراہیم کے گیت کو سراہتے ہوئے اسے بہترین انتخاب قرار دیا اور کہا کہ وزیراعظم نے نہایت خوبصورت اور پُرجوش انداز میں گیت پیش کیا۔
سومک دتا رائے نے لکھا کہ زندگی اتار چڑھاؤ کے سروں سے مل کر بننے والا ایک گیت ہے اور انہیں وزیراعظم کی یہ پیشکش بہت پسند آئی۔
انہوں نے اسے برکس 2026 سے متعلق سرگرمیوں کا ’’سب سے خوشگوار لمحہ‘‘ قرار دیا، انسٹاگرام پر حلیزہ جیفری نے بھی آگ کے ایموجی کے ساتھ انور ابراہیم کی کارکردگی کو سراہا۔
یہ گیت 1965 میں ریلیز ہونے والی ہندی فلم ’’تین دیویاں‘‘ کا حصہ تھا اور کشور کمار کے مقبول ترین گیتوں میں شمار ہوتا ہے۔
ایک منٹ 32 سیکنڈ دورانیے کی اس ویڈیو کو ایکس پر تقریباً 6 لاکھ 50 ہزار مرتبہ دیکھا جا چکا تھا، جبکہ دیگر سوشل میڈیا پلیٹ فارمز پر بھی اسے مثبت ردعمل موصول ہوا۔
