( ویب ڈیسک )ٹیکنالوجی کی دنیا کی معروف کمپنی ‘سام سنگ’ نے مستقبل کی ڈیوائسز کی جانب ایک بڑا قدم اٹھاتے ہوئے اپنے جدید ترین اے آئی اسمارٹ گلاسز متعارف کرادیئے، ان اسمارٹ گلاسز کی سب سے خاص بات ان میں گوگل کا نیا آپریٹنگ سسٹم ‘اینڈرائیڈ ایکس آر’ اور طاقتور اے آئی ماڈل ‘جیمنی’ کا شامل ہونا ہے۔
گزشتہ کچھ عرصے سے سام سنگ، گوگل اور کوالکوم کے درمیان ان اسمارٹ گلاسز کی تیاری کے حوالے سے خبریں گردش کر رہی تھیں، اور اب باقاعدہ طور پر اس پروڈکٹ کی پہلی جھلک پیش کر دی گئی ہے۔
یہ گلاسز خاص طور پر ایکسٹینڈڈ رئیلٹی (ایکس آر) ڈیوائسز کے لیے بنائے گئے گوگل کے نئے آپریٹنگ سسٹم پر کام کرتے ہیں، اس سافٹ ویئر کی بدولت صارفین کو اپنی آنکھوں کے سامنے ایک ہموار اور بہترین آگمینٹڈ رئیلٹی کا تجربہ ملے گا، جس سے ڈیجیٹل دنیا اور حقیقی دنیا کا فرق کم ہو جائے گا۔
یہ بھی پڑھیں:آبنائے ہرمز میں سناٹا! قیمتوں میں ریکارڈ توڑ اضافے کا امکان
ان گلاسز میں گوگل کا جدید ترین اے آئی ماڈل ‘جیمنی’ موجود ہے، اس کی مدد سے صارفین صرف وائس کمانڈز کے ذریعے گلاسز کو کنٹرول کر سکیں گے، یہ اے آئی ریئل ٹائم میں چیزوں کو پہچاننے، لائیو ٹرانسلیشن کرنے، نیویگیشن فراہم کرنے اور روزمرہ کے کاموں میں ایک بہترین ورچوئل اسسٹنٹ کے طور پر کام کرے گا۔
سام سنگ نے اس بات کو یقینی بنایا ہے کہ یہ اسمارٹ گلاسز گلیکسی اسمارٹ فونز اور دیگر اینڈرائیڈ ڈیوائسز کے ساتھ بغیر کسی رکاوٹ کے کنیکٹ ہو سکیں، صارفین اپنے فون کے نوٹیفکیشنز، میسجز اور نیویگیشن براہ راست گلاسز کے لینز پر دیکھ سکیں گے۔
ماضی کے بھاری بھرکم وی آر ہیڈسیٹس کے برعکس، سام سنگ نے ان گلاسز کو ایک عام چشمے کی طرح ہلکا اور آرام دہ بنانے کی کوشش کی ہے تاکہ انہیں سارا دن پہنا جاسکے۔
