(ویب ڈیسک)آسٹریلیا میں برڈ فلو (ایویئن انفلوئنزا) کا ایک نیا کیس سامنے آنے کے بعد حکام نے ملک بھر میں نگرانی مزید سخت کرتے ہوئے پولٹری فارمز پر حفاظتی اقدامات بڑھا دیے ہیں۔
متعلقہ اداروں کا کہنا ہے کہ وائرس کی موجودگی کی تصدیق کے بعد متاثرہ مقام کو قرنطینہ میں لے لیا گیا ہے تاکہ بیماری کے مزید پھیلاؤ کو روکا جا سکے۔
آسٹریلوی محکمہ زراعت اور حیاتیاتی تحفظ کے مطابق متاثرہ فارم پر موجود پرندوں کو تلف کیا جا رہا ہے جبکہ اردگرد کے علاقوں میں بھی جانچ کا عمل جاری ہے، حکام نے پولٹری فارمرز کو غیر ضروری نقل و حرکت محدود رکھنے، فارموں میں صفائی کے سخت انتظامات کرنے اور کسی بھی مشتبہ کیس کی فوری اطلاع دینے کی ہدایت کی ہے۔
ماہرین کا کہنا ہے کہ موجودہ شواہد کے مطابق عام شہریوں کے لیے خطرہ کم ہے، تاہم وائرس کے پھیلاؤ کو روکنے کے لیے احتیاطی اقدامات ضروری ہیں، حکام نے واضح کیا ہے کہ پولٹری مصنوعات کی فراہمی برقرار ہے اور خوراک کی حفاظت سے متعلق معیارات پر مسلسل عمل درآمد کیا جا رہا ہے۔
یہ بھی پڑھیں:برطانیہ بلغاریہ یوکرین نے ایران جنگ میں شامل نہ ہونے کی یقین دہانی کرائی ہے:اسماعیل بقائی
برڈ فلو کے حالیہ کیس کے بعد آسٹریلیا میں حیاتیاتی تحفظ کے نظام کو مزید فعال کر دیا گیا ہے جبکہ حکام صورتحال پر مسلسل نظر رکھے ہوئے ہیں تاکہ وائرس کو دیگر فارموں تک پھیلنے سے روکا جا سکے۔
