روس: روس کے شہر یکاتیرنبرگ میں جاری ورلڈ یوتھ فیسٹیول 2026 میں پاکستان سے نوجوانوں کی بھرپور شرکت جاری ہے۔ سماجی تنظیم وانگ کے چار نوجوان ابرار احمد رونجھو، اسمہ علی، سلمان خان رونجھو اور سعید انور رونجھو عالمی سطح کے اس اہم یوتھ فیسٹیول میں پاکستان کی نمائندگی کر رہے ہیں۔
11 سے 17 ستمبر 2026 تک جاری رہنے والے فیسٹیول میں دنیا کے مختلف ممالک سے نوجوان شریک ہیں، جہاں ثقافتی تبادلے، سماجی روابط، نوجوانوں کے کردار، بین الاقوامی تعاون اور مختلف شعبوں میں تجربات کے تبادلے سمیت متعدد سرگرمیوں کا انعقاد کیا جا رہا ہے۔
وانگ کے نوجوان شرکاء بھی فیسٹیول کی مختلف سرگرمیوں میں فعال طور پر حصہ لے رہے ہیں اور پاکستان کی ثقافت، روایات اور نوجوانوں کی صلاحیتوں کو عالمی برادری کے سامنے اجاگر کر رہے ہیں۔
ابرار احمد، اسمہ علی، سلمان خان اور سعید انور کی اس بین الاقوامی فیسٹیول میں شرکت نوجوانوں کے لیے ایک مثبت مثال قرار دی جا رہی ہے۔ ان کی شرکت سے نہ صرف پاکستان کا مثبت تشخص اجاگر ہو رہا ہے بلکہ عالمی سطح پر نوجوانوں کے درمیان روابط اور دوستی کو فروغ دینے میں بھی مدد مل رہی ہے۔
سماجی تنظیم وانگ کے نوجوانوں نے اس موقع پر پاکستان کی نمائندگی کو اپنے لیے باعثِ فخر قرار دیتے ہوئے کہا کہ ایسے عالمی پلیٹ فارمز نوجوانوں کو ایک دوسرے کی ثقافت اور تجربات سے سیکھنے، نئے روابط قائم کرنے اور مستقبل میں مشترکہ اقدامات کے مواقع فراہم کرتے ہیں۔
ورلڈ یوتھ فیسٹیول 2026 میں وانگ کے چار نوجوانوں کی شرکت پاکستان کے متحرک، باصلاحیت اور باشعور نوجوانوں کی عالمی سطح پر موجودگی کا ایک خوبصورت مظہر ہے۔
